తెలుగు రాష్ట్రాల రాజకీయాల్లో ఉత్కంఠ రేపుతున్న పరిణామం ఇది. భారత్ రాష్ట్ర సమితి – అధినేత, మాజీ ముఖ్యమంత్రి కేసీఆర్‌తో ఆ పార్టీలో కీలక నేత, మాజీ మంత్రి హరీశ్‌రావు మరోసారి సమావేశమైయ్యారు. ఇటీవల వరుసగా భేటీ కావడం రాజకీయ వర్గాల్లో హాట్ టాపిక్‌గా మారింది. ఎర్రవల్లిలోని కేసీఆర్ నివాసంలో జరిగిన ఈ భేటీకి పలు కీలక అంశాలపై చర్చించారు.
కాళేశ్వరం నోటీసులు, పార్టీలో మార్పులు
ఇటీవల తెలంగాణ రాజకీయాలను కుదిపేస్తున్న కాళేశ్వరం ప్రాజెక్టు వ్యవహారంపై ఈ భేటీలో కీలకంగా చర్చించినట్లు తెలుస్తోంది. కాళేశ్వరం ప్రాజెక్టుపై నియమించిన జ్యుడిషియల్ కమిషన్, ప్రాజెక్టు నిర్మాణంలో కీలక పాత్ర పోషించిన మాజీ మంత్రి హరీశ్‌రావుకు నోటీసులు జారీ చేయడం తెలిసిందే. ఈ నోటీసుల నేపథ్యంలో కేసీఆర్, హరీశ్‌రావు మధ్య చర్చ జరగడం అత్యంత ప్రాధాన్యత సంతరించుకుంది. కమిషన్ విచారణ, నోటీసులకు స్పందించాల్సిన తీరు, భవిష్యత్ కార్యాచరణ వంటి అంశాలపై ఇరువురు నేతలు లోతుగా చర్చించినట్లు విశ్వసనీయ వర్గాల సమాచారం. కాళేశ్వరం ప్రాజెక్టును గత బీఆర్ఎస్ ప్రభుత్వం ప్రతిష్టాత్మకంగా భావించి నిర్మించింది. కానీ ఇప్పుడు అది వివాదాలకు కేంద్రంగా మారింది. ఈ పరిస్థితుల్లో న్యాయపరమైన సవాళ్లను ఎదుర్కోవడానికి ఎలాంటి వ్యూహాన్ని అనుసరించాలనే దానిపై స్పష్టత కోసమే ఈ సమావేశం జరిగినట్లు తెలుస్తోంది.
కవిత లేఖ, పార్టీ అంతర్గత పరిస్థితులు
కేవలం కాళేశ్వరం వ్యవహారం మాత్రమే కాకుండా, పార్టీలో ఇటీవల చోటుచేసుకుంటున్న కొన్ని కీలక పరిణామాలపై కూడా ఈ భేటీలో చర్చ జరిగినట్లు సమాచారం. ముఖ్యంగా, కేసీఆర్ కుమార్తె, ఎమ్మెల్సీ కవిత ఇటీవల రాసిన లేఖ రాజకీయ కలకలం రేపింది. పార్టీ అంతర్గత చర్చలకు తెరలేపింది. లోక్‌సభ ఎన్నికల్లో పార్టీ ఓటమి అనంతరం కవిత రాసిన ఈ లేఖ, బీఆర్ఎస్ ఎదుర్కొంటున్న సవాళ్లను, భవిష్యత్ కార్యాచరణను సూచించింది. ఈ లేఖ నేపథ్యంలో పార్టీలో నెలకొన్న పరిస్థితులు, నాయకుల మధ్య సమన్వయం, కార్యకర్తల్లో నైతిక స్థైర్యం పెంపొందించడం వంటి అంశాలపై కేసీఆర్, హరీశ్‌రావు చర్చించినట్లు తెలుస్తోంది.
